Puisi Bahasa Banjar Ali Syamsudin Arsi

(Beberapa waktu yang lalu, penyair Banjar, Ali Syamsudin Arsi, mengirimi saya dua buah puisi via email. Meski kurang mengerti dengan makna, baik yang tersurat maupun yang tersirat di dalamnya, kedua puisi berikut ini layak dinikmati, setidaknya dari sisi rima dan keindahan iramanya. Selamat menikmati!)

Puisi-puisi Bahasa Banjar *)
Ali Syamsudin Arsi

MUDIK HAJA GIN

pas banar, kuta tu manis kaya madu
amun sadang takarannya nyaman haja kalu?
amun kabanyakan, pahit kaya hampadu
takumpul barataan; matan di bukit matan di hulu
imbah marasai hanyar maka tahu

di banua pina bakadap jar, nang ngitu-ngitu haja
handak jua pang maubah rasa
nang kaya di tipi, di parabula

kai nini, mama abah ditinggalakan
kada kawa ai, hati handak
pahumaan maka tinggalam lawan banta
padahal di kuta tu ngalih banar bahinak
hi – ih
guring badiri, mandi bakajal, baduduk gin sasak
tasalah bajalan bisa ramuk awak
amun kada kakaruan, ganal kapala pada kupiah

nang kaya maudak sarang wanyi;
bakawai-kawai, mambari-bari
handak maambili madunya
imbah baparak; nging !! manginging di talinga
imbah dijapai; nyut !! marinyut di kapala

han, iya kalu
mudikkan haja gin, … lah

Sebamban 1, 31 Maret 1994

*) Puisi tersebut terdapat dalam buku “Pengkajian Puisi: TEORI dan APLIKASI” karangan Endang Sulistyowati dan Tarman Effendi Tarsyad, halaman 131 – 132, Tahura Media Banjarmasin tahun 2009 dan merupakan puisi juara II pada Lomba Cipta Puisi Bahasa Banjar yang dilaksanakan oleh HIMSI Kalsel tahun 1994.

***

HABANG BIJI MATA MANJANAKI BANUA

bagana di tangah pahumaan asa masam kuluman
bahari pangulirnya balajar-bagawi
kuitan wan paninian tuhuk haja pang mamadahi
kada usah manjapai ka tajak maniring haja gin ngalih
apalagi mariwasakan ka kumpai nang tagah
han, iya kalu
inya mahir mahadap haja
mun di kampong marasa paling harat, paling pintar
padahal, … cah

tulak ka kuta kada kawa bahinip balalawasan
asa galisah, karasak-karusuk, ngalih banar badiam
naning tu pang kapala maulai panghidupan
kada usah nang halal nang haram gin bacacakutan
hi – ih
sapaguringan gin sawat haja baiigutan
han, iya kalu
mahir banar maudak gangan kawan
cawawa mun damintu lakunnya

tulak ka hutan kada kawa jua jar bagana
lingis tu pang puhun-kayunya
tatinggal tunggul ulin carucukan
bujur banar
halalang ha pulang bakulilingan

batanah warisan nang pina subur tajual lawas sudah
balubang-lubang dikaruk urang isinya
ada haja pang tarasai sadikit, … habunya
bubuhannya nyaman ai tatawaan manambah karuh batang banyu

saurang maka taungut maniring-diri

han, dimapa diaku
habang tupang biji-mata manjanaki banua
***